Joh 16 | AOJFILIFITA | STEP | EaꞋ Jisas naꞋipam wapotiꞋ naꞋi, “AeꞋ deiꞋ aꞋipipa basef amama hiꞋalam ma ipeꞋ ina pekwaha pembaleꞋefa aeꞋ, owaꞋ.

g - Jo 16:13Jo 14:261 Jo 2:27

John 16

1 EaꞋ Jisas naꞋipam wapotiꞋ naꞋi, “AeꞋ deiꞋ aꞋipipa basef amama hiꞋalam ma ipeꞋ ina pekwaha pembaleꞋefa aeꞋ, owaꞋ. 2 Anona nemaf esis sogaloꞋmepa ifagw esis Juda saꞋi basef sapeimi. Anona nemaf notaga ma emi egafis sehepa pegaꞋ, esis ukup mondandaꞋ siꞋi sandaꞋ maol buꞋunai Godi. OwaꞋetin. 3 FowaꞋ esis ina sogawa Ahalome naloma aeꞋ wapotiꞋ, owa. NaꞋama esis sandaꞋ waf anama aonai. 4 EaꞋ deiꞋ aꞋipipa eaꞋ ma amamaga amama. Ama nemaf anama neataga ma esis sondaꞋepa naꞋama, ipeꞋ ukup mondandaꞋma basef amama deiꞋ aꞋipipami.

Maol Ambal BuꞋunai Godi

5 FowaꞋ AeꞋ ape alomepa AeꞋ ina aꞋipipa ma amamaga amama, owaꞋ. EaꞋ deiꞋ aeꞋ efeꞋma anan anama nasapaꞋe afiꞋi. Ina anona aman ipeꞋinai nahaliꞋi naꞋi, ‘IneꞋ nefeꞋ eti?’ OwaꞋ. 6 AeꞋ aꞋipipa basef amama eaꞋ ma ipeꞋ. EaꞋ deiꞋ opalef ipeꞋimi nimanim endilisi. 7 EaꞋ aeꞋ aꞋipipa basef endilisimi. AeꞋ ikwahipa efeꞋ ma igiambamepa pepe andeandeꞋ. IꞋi aeꞋ owaꞋ eafeꞋ, deiꞋ Ambal BuꞋunai Godi nondaꞋepa laꞋifipa, ina nambimb nifiꞋmai ipeꞋ, owaꞋ. IꞋi aeꞋ efeꞋ, esapaꞋana nifiꞋmai ipeꞋ. 8 Nemaf anama niefiꞋianai, nihiꞋamba esis amam nematawa saila waf etapanai ma sogawa basef ofagema ma waf aonai noloma waf buꞋunai noloma wafa God nowaloga epes hiesi ma nondaꞋmasa basef. 9 Waf aonai ofagena asasinai naꞋama. Esis ina sombaleꞋefa aeꞋ, owaꞋ. 10 Waf ofagena buꞋunai naꞋama. AeꞋ efeꞋma Ahalome eaꞋ ipeꞋ ina petolowe wapotiꞋ, owaꞋ. ^{▼▼Epes etapasi sandaꞋmana basef Jisas eaꞋ saꞋi anan nandaꞋ waf aonai ma sohana nogaꞋ. EaꞋ God nafelana nohafel hiꞋagif wapotiꞋ nofaꞋana nafeꞋ heven nape naloma God. EaꞋ God Anan nihiꞋambasa Jisas nandaꞋ waf buꞋunai atona.} 11 Basef ofagema ma kot naꞋama. Aman dembinai aonai ma epes etapasi, anan fasoꞋmana ma kot anama ma basef luꞋwami God deiꞋ nandaꞋmanami. ^{▼▼Epes etapasi sati Jisas nagaꞋ eaꞋ esis ukup maꞋi, Jisas higilalana ma kot. OwaꞋetin. GaꞋ Jisasi atona, God nandaꞋ kotim Satan nahagofa laꞋifimi ananimi
,} ^{c
,} ^{d
,} ^{e
,} ^{f
,} ^{g
,} ^h

12 AeꞋ basef hiami ma aꞋi ieꞋipipa emi, eaꞋ ipeꞋ ina laꞋifipama pefaꞋam deiꞋ, ataꞋ owaꞋ. 13 Nemaf anama Ambal BuꞋunai Godi naꞋi basef endilisimi atomi niefiꞋi, nihiꞋambepa ma basef hiami endilisimi. Anan ina nowalapa basef nomonas ananimi atom, owaꞋ. Basef nameꞋam eaꞋ, amama atom nowalapam niꞋipipam. Ama niꞋipipa amamaga amama maꞋi anona nemaf migiꞋ meatagai. 14 EaꞋ nofaꞋ basef aeꞋami nowalapama ipeꞋ ma nowalapa agel aeꞋanai. 15 Amamaga Ahalomei AeꞋanai hiami, amama aeꞋami. EaꞋ deiꞋ AeꞋ aꞋiam aꞋi nambimb Ambal BuꞋunai Godi nofaꞋ basef AeꞋami niꞋiam nowalapama ipeꞋ.

Ukup nimanimi nambimb mondamboma eaꞋ mondaꞋepa pendanifel

16 Nogota bandana ipeꞋ ina nambimb petolowe wapotiꞋ, owaꞋ. EaꞋ nambimb ipeꞋ petolowe wapotiꞋ.”

17 Anom alupumi ananimi, amam atom mandaꞋipama maꞋi naꞋama maꞋi, “Maim basef ofagema amama anan naꞋipafa emi? Anan naꞋi, nogota bandana afaꞋ ina nambimb otolona, eaꞋ nambimb otolona wapotiꞋ. NaꞋi nefeꞋma Ahalomana. AfaꞋ ina ogawa basef amama ofagema, owaꞋ.”

18 EaꞋ amam maꞋiam wapotiꞋ maꞋi, “Nogota anama bandana anan naꞋianai, amama amamaga maim? AfaꞋ ina ogawa basef amama naꞋiam naꞋama, owaꞋ.”

19 EaꞋ Jisas nogawa amam maꞋi mohaliꞋana, eaꞋ naꞋipam naꞋi, “AꞋi ipeꞋ pahaliꞋima basef amama ofagema aeꞋ aꞋiami. AeꞋ aꞋiam naꞋama. Nogota bandana ipeꞋ ina petolowe, owaꞋ. EaꞋ nambimb ipeꞋ petolowe wapotiꞋ. 20 Endilisi aeꞋ aꞋipipa. Nambimb ipeꞋ pelef mehip pendahowe. EaꞋ esis amam nematawa saila waf etapanai sondanifel. EaꞋ ipeꞋ opalef nimanim. OwaꞋetin. Opalef ipeꞋimi nimanim eaꞋ nambimb mondamboma mondaꞋepa pendanifel endilisi. 21 NemataꞋw opafuꞋwi ma kwaꞋi kola awani akwaꞋw kwameꞋ nimanimi kogawa nogota bandana ma kola awani nataga eaꞋ. NaꞋama opaf akwaꞋunai nimanina. AkwaꞋw kolana eaꞋ, akwaꞋw ina ataꞋ okom nandandaꞋma nimanimi amama wapotiꞋ, owaꞋ. AkwaꞋw kwandanifel etin kwapoma soꞋusoꞋwin nataga nape etap eaꞋ. 22 IpeꞋ naꞋama etin, deiꞋ ipeꞋ opalef nimanim. EaꞋ nambimb aeꞋ itilipa wapotiꞋ, opalef ipeꞋimi boꞋom. Ina enin epen laꞋifina nogaloꞋma danifel anama ipeꞋinai, owaꞋ. 23 Nemaf anama ipeꞋ ina pihaliꞋi ma anom amamaga atom, owaꞋ. EaꞋ deiꞋ aeꞋ aꞋipipa basef endilisimi ipeꞋ. IꞋi ipeꞋ pihaliꞋ Ahalome ma maim amamaga ma agel aeꞋanai, nambimb neseꞋepam. 24 FowaꞋ ipeꞋ ina pahaliꞋana ma pefaꞋ anom amamaga agel aeꞋanai, owaꞋ. DeiꞋ pihaliꞋanamam, pefaꞋama opalef ipeꞋimi boꞋom endilisi.

Jisas nikilaꞋ waf etapanai eaꞋ

25 AeꞋ deiꞋ aꞋi basef amama womun etina ipeꞋ. EaꞋ aeꞋ ina nambimb ataꞋ iꞋipipa basef womun etin, owaꞋ. Nemaf anama aeꞋ ewalapam alihim iꞋipipam ipeꞋ ma Ahalome. 26 Ama nemaf anama ipeꞋ pihaliꞋ Ahalome ma agel aeꞋanai. AeꞋ ina ataꞋ iꞋipipa naꞋama iꞋi aeꞋ atowe ihaliꞋana ma nigiambamepa, owaꞋ. 27 Ahalome atona okom nainailipa endilisi. DeiꞋ main, ipeꞋ ukup maimaila aeꞋ endilisi, eaꞋ ipeꞋ pembaleꞋefa aeꞋ pegawa aeꞋ ape aloma God afiꞋi. 28 FowaꞋ gani aeꞋ ape aloma Ahalome eaꞋ akwahona afiꞋi etap anaeꞋ. DeiꞋ aeꞋ aꞋi ekwaha etap anaeꞋ etanima efeꞋma anan.”

29 EaꞋ alupumi ananimi maꞋi, “DeiꞋ ineꞋ naꞋipafam alihim, ina ataꞋ naꞋi basef womun etin, owaꞋ. 30 DeiꞋ afaꞋ ogawa ina ataꞋ nape nehafa enin epen nihaliꞋina niliꞋ, owaꞋetin. IneꞋ negawa amamaga hiami eaꞋ. Amama atom deiꞋ afaꞋ wambaleꞋefa ineꞋ nape naloma God nafiꞋi.”

31 EaꞋ Jisas nagwamama basef naꞋipam naꞋi, “IpeꞋ deiꞋ pembaleꞋefa aeꞋ aꞋ amon? 32 IpeꞋ pemeꞋ. Nogota felefeleꞋ notaga, endilisi nataga eaꞋ ma sogaloꞋma ipeꞋ hipei atona etin pefeꞋ wambel ipeꞋinai. EaꞋ pekwaha aeꞋ atowe epe. EaꞋ ina aeꞋ atowe epe, owaꞋ. Ahalome nape nalome. 33 AeꞋ aꞋi ipeꞋ pepe pelome opalef ipeꞋimi mope awanem. NaꞋama deiꞋ aꞋipipa basef amama. Etap anaeꞋ ipeꞋ pemeꞋ opalef nimanim. Pepe laꞋifipa! DeiꞋ main, aeꞋ agaloꞋma waf aonai etapanai ikilaꞋana eaꞋ.”